BRT Cebu: Labing Modernong Sakyanan sa Kapatagan

Gibutyag ni Kalihim Florencio “Butch” Abad sa Department of Budget and Management (DBM) niadtong Martes nga gikinahanglang mouswag ang mga kahimananan sa transportasyon dinhi sa Cebu pinaagi sa pagmugna og de kalidad, ug mapadayonon alang sa tanan nga mao ang bus rapid transit (BRT) system.

Kini sugdan pagtrabaho sa dili pa matapos kining tuiga 2014, ug gitakdang humanon unya sa 2018 uban sa gahin nga P10.62 bilyones.

Matud pa ni Abad nga kun mahuman na ang maong proyekto mao kini ang labing paspas, minus gastos, ug komportabli alang sa mga pasahero.

Midugang si Abad nga ang BRT system sa Cebu maoy labing moderno nga matang sa panakyanan sa kapatagan nga mohatag og labing maayong serbisyo sa mga trabahante, negosyante, mga estudyante ug alang sa tanang pasahero.

Nagkanayon si Abad nga gilig-on na sa DBM ang budget niini ug gani miluwat na usab kini og Forward Obligational Authority (FOA) ngadto sa Department of Transportation and Communications (DOTC) alang sa maong proyekto.

Sumala ni Abad, aron hingpit kini nga mapatuman, mangutang ang kagamhanan sa Pilipinas sa Agence Francaise de Development (AFD), ingon man sa International Bank for Reconstruction and Development (IBRD), ug sa Clean Technology Fund.

Ang Forward Obligational Authority (FOA) nga giluwat sa DBM manglangkob sa katibuk-ang kantidad nga P9.48 bilyones uban usab sa tampo nga gasto sa nasudnong kagamhanan, sumala pa ni Abad.

Ang nahibiling P1.14 bilyones abagahon pinaagi sa sektor nga pribado sa pagpamalit sa gikinahanglang mga behikulo, dugang pa ni Abad.