Suwat Ni Rama sa Santo Papa, Wala pay Tubag

Walay feedback ang sulat ni Mayor Michael Rama ngadto sa Vatican bahin sa hangyo niini nga paduawon ang Sto. Papa dinhi sa Sugbo atol pagbisita niya sa nasud karong sunod buwan.

Gikonpirma kini ni Sinulog Director Ricky Ballesteros atol sa Tapok-Tapok sa Media sa Sugbo didto sa Cebu Business Hotel niadtong Biyernes sa buntag.

Sa bahin usab ni Ballesteros, wala siya magtuo nga makaduaw gayud ang Sto. Papa dinhi sa Cebu tungod sa ka-busy niini sa iyang panaw nianang higayona.

Usa sa labing gibantayan ni Ballesteros mao ang dagan sa Sinulog, sa mga mosalmot niini, ang kamalinawon ug ang kahapsay ug tanang mga aspeto sa maong tinuig nga kalihokan ilabi na ang panalapi niini.

Matud pa ni Ballesteros nga dili na siya gusto nga magkompiyansa sama sa nahitabo niadtong 2012 nga Sinulog diin nawagtang daw aso ang P1.7 milyones nga pundo sa Sinulog.

Kun sa adlaw sa Sinulog moanhi ang Sto. Papa, mas labing maayo, matud pa ni Ballesteros.

“Apan ambot lang kun may plano ba ang Sto. Papa sa pagduaw nganhi sa Cebu kay ang tinuod gud nga nagbuot sa iyang biyahe ug schedule sa duawonon nga lugar mao man ang Vatican,” matud ni Ballesteros.

Hinuon, tungod kay may suwat na si Mayor Rama ngadto sa Vatican, nagtuo si Ballesteros nga tun-an kini sa taga Vatican.

Kun motugot ang Vatican nga makaduaw sa sunod tuig ang Sto. Papa dinhi sa Cebu, mao pa kini ang unang higayon sukad sa kasaysayan sa Katolisismo dinhi sa nasud nga duawon sa Sto. Papa ang nasud sa duha ka magsunod nga tuig, matud pa ni Ballesteros.

“Manghinaot lang ta nga mao kini tinuod nga mahitabo”, dugang pa ni Ballesteros.