DFA Mipasalig nga Produksyon sa Pasaporte Hapsay na

Gipasaligan sa Department of Foreign Affairs (DFA) ang publiko nga hapsay na karon ang produksyon sa mga pasaporte human maengkuwentro niini ang mga problemang teknikal hinungdan sa pagkaputol makadiyot sa pagpaggama og pasaporte niini.

Matud pa sa DFA kagahapon sa buntag, nga sulbaron nila ang kalangay sa pagkuha og pasaporte sa mga aplikante niini sulod sa tulo ngadto sa upat ka semana.

Kini pinaagi sa 24-oras nga trabaho sa iyang mga kawani bisan sa mga adlawng Sabado ug Domingo, ug sa mga piesta opisyal aron pagsulbad sa kalangay sa pagpangluwat og pasaporte ngadto sa mga biyahidor sa gawas sa nasud.

Gumikan niini, mapinaubsanong nangayo og pasaylo ang Departamento sa kalangay nga nahitabo ug ang kasahol nga nasugatan sa mga Filipino.

Sa pagkakaron, mipasalig ang DFA nga himoon nila ang tanang pamaagi nga ikaluwat na sa tukmang panahon ang mga pasaporte ug mihangyo nga sabton lang unta sila sa publiko sa ilang pagkuwang nga nahimo.