HungHong

Tinagoang pamulong ang hunghong,
tinuyo aron dili masuhong,

Pagdayeg, panaway, pamantay,
sa hunghong ipakuyanap, ipakatay,

Siguradohang dili bungol imong gihunghungan,
basin ug sininggitay ang mahimong sangputanan,

May manghunghong nga magpurong,
baba magkibotkibot, kamot maampingon,

Hapuhap, hinol, tutho ug laway gamiton,
pagkaalbularyo, hunghong sayonsayonon,

May gulangon nga gihunghongan,
lab-as ug presko kuno ang inandam,

Pagsusi, bag-ong ligo lang diay,
ang putaheng kusog mokiaykiay,

May hunghong nga makapaukay,
katawha’ng nagbagotgot, nagsusapinday,

Lamdagan, sa hunghong nga makalipay,
kurakot sa kaban, sa dili madugay

Kasuhan, hukman, ipasulod sa bilangguan,
may hunghong didto, may hunghong dri,

Mura’g katuhuan, mura’g dili,
masuhong man o dili, ihunghong nato kini.

Source: Atty. Lobedica’ Blog Site
Image credit: www.wisegeek.com